爛gag走爛(難)吖，唔該！

以前睇電視劇，成日會見到啲男主角衝進傾盆大雨之中，對住個天大嗌「點解你要玩我－－！」；羅文又有唱過「何必偏偏選中我？」。大家都覺得天大地大，點解係得自己咁黑仔呢？不如學某人咁嚟計一計數(不過更加簡單)：
假設上帝一分鐘可以玩5個人，咁佢玩完全港所有人都係用兩年半多啲嘅時間，所以人生中每三兩年跌一跌實屬好平常，同時亦都可以解釋到點解我會每兩年左右就會唔見一次手機。
做咗咁耐人，呢啲大玩笑都中過唔少，雖則次次都雨過天青，但其實份人暗啞底都爛咗七七八八。所以我幾乎每次同人開玩笑，都係帶有爛屬性嘅。就算平時無咩機會講，爛屬性都會潛移默化，喺夢入面表現出嚟。噚晚我就發咗個咁嘅夢：

我係一個電視台攝影隊嘅工作人員，喺度拍梗一班男芭蕾舞者跳舞嘅音樂特輯(唔知點解，背景音樂係Enimem嘅 Lose Yourself)。休息時份我上廁所嗰陣，其中一個芭蕾舞員走咗入嚟，於是兩人一邊fing一邊吹水…
我：「頭先跳得唔錯喎！」
芭：「算係咁啦！跳芭蕾舞係我嘅終身事業，我一定會盡全力嘅！」
我：「你真係『我不入地獄，誰入地獄？』喎！」
芭：「咩嘢話！？」
我：「你嘅人生就係不停咁喺度轉(鑽)，遲早落地獄啦！」
芭：「……」
就喺呢個時候，我本來應該瞓梗覺嘅意識突然醒咗一醒，然後對住夢中嘅我講：
「用口語講埋啲食字爛gag，叫人哋點聽得明啊？」
夢中嘅我：「…又係噃！」

夢嘅結局係點，我起身的一刻已經忘得一乾二淨。至少我知道自己除咗發夢都會講爛gag之外，仲可以同夢中嘅自己傾計，睇嚟以後瞓覺都唔駛呻悶囉。