安居樂業

幾年之前，屋企冷氣機位對落嗰面牆度，出現咗一條小小嘅裂縫。老媽搵咗管理處上黎睇，結果有位阿叔望咗兩眼，之後叫我哋等消息，一等就等咗三幾年。呢三年間，條裂縫漸漸長大，變咗一條半厘米闊，一米長左右既鴻溝(好誇)，落大雨之後仲會輕微滲水。再一次去管理處叫反映，又黎咗一位唔知係咪同一個阿叔，今次佢話大廈外牆係管理處負責、內牆係屋主負責，之後拍拍屁股又走咗去。

無辦法，唯有自己補返佢。唔係部冷氣跌落街嗰陣，都唔知點算。橫掂個廁所同廚房都有好多毛病，順便改一下個洗衣機位都好。

呢兩日搵咗幾位師傅過黎睇睇。每位師傳都微笑住話我哋屋企唔需要大裝，係度牆補返佢就得喇。如果問佢哋個廚房一定要改咁點算呀？佢哋就話差唔多要改哂成間屋咁滯。似乎暗喻緊之前嗰手裝修師傅嘅厲害。

左計右計，老媽又話不如就咁補返條罅然後賣左層樓算了。

十分r頭。

我只係想要個普普通通，住得安心嘅地方嗟…

=====================================================

上個月某日，我同朋友A同網友B一齊食lunch。

朋友A無啦啦問我：「你上次幾時睇過樓？」
我諗咗陣，答都唔記得喇～
之後朋友A又問B：「你幾耐無睇樓？」(B不過20出頭)
B搖搖頭。
之後A就話：「唉～你哋都係唔適宜喺香港生存喇！」

我同B兩人面面相覦…