凱恩關西八日豪hea團 ~序~

八日行程完結，感覺如梭似箭。日本太多奇趣之事，大家一定要身置其中細細品味。不過八日以來發行喺我身上嘅某喲經歷，我就希望將來唔會發生喺你哋身上。

為咗方便大家睇我黎緊呢八篇故事，最好先作一下人物介紹：

凱恩：主角，即係我。陰差陽錯跟一班師奶去日本玩。目的為咗影相同埋睇女仔。

老媽：即係我老媽。日本之旅策劃人之一。性格陰晴不定，間中火爆。

P先生：關鍵人物之一。商人一名，喺世界各地多處都有樓有地有老婆仔女。有錢佬本性，語氣多少帶有囂張。最初計劃寄宿佢屋企。

C奶：關鍵人物之二，老媽的朋友。唔肯洗錢、唔鐘意shopping、兼且年紀大唔肯行。由於出發前一日食野整爛咗隻牙，成個旅程都牙痛，唔食得硬嘢涷嘢酸嘢甜嘢。對我黎講點解今次要黎日本玩係一個謎。

A小姐：老媽嘅朋友。以前曾去過關西。乜都無所謂。

W太：老媽嘅朋友。standard師奶性格，愛貪小便宜加上輕度購物狂。今次旅行團原本P先生只招待W夫婦，因為W太周圍同師奶朋友講，所以最後變咗咁多人。

W先生：W太老公同埋P先生老友。好鍚老婆，我估貪小便宜都係佢老婆傳染嘅。

我相信聰明嘅各位睇完以上組合已經知道會發生咩嘢事。不過為俾各位睇下靚相(其實唔係好靚)同發洩吓我啲冤屈氣，未來幾日還望各位不嫌我長氣，多多包涵。